Baghawat

Barson tak, suraj tapta raha, chand pighalta raha
Mausam badalte rahe, ganit ke kisi samikaran ki tarah, santulit.
Tare bhi ugte rahe, suraj ke chipne ke baad, sabhi kuch bhautiki ke niyam se bandhe huye, prashnaheen.
Phir ek din achanak taron ne baghawat kar di

Kyon hota hai aisa ki jab suraj hamein garmata to chand gayab, aur jab chand pighale to suraj lupt.
Kyon hota hai aisa ki hamein pyar to milta hai, lekin juda juda
Jaise subah ki chai mein adrak jyada, aur shaam ko chini kam
Kyon rahen hum tiraskrit, kinchit wanchit, kisi talakshuda jode ke beech
Kyon hamara astitva bane rui ka bojh, jo pahle to hota hai kam, par aansoonon ke saath badhta hi jata

Aur samikaran hua asantulit, sahi ya galat, pata nahin
Par ek prashn hua, jo tha ab tak kahin nahin
Aur jo sab chale ja rahe the, jaise apni hi saleeb uthaye
Wo ek pal ke liye hi sahi, ruke, kuch digbhramit
Aur laga ki saari khushi us ek pal mein samai
Prasn ki, astitva ki khushi

Aur yuon ek din taron ne baghawat kar di......